Барааны тайлбар:

“Төмөр занга” роман нь энэ оны эхээр Казахстанд хэвлэгдсэний дараа уншигчдын анхаарлыг гойд татсан юм. Эзлэн түрэмгийлэгчдэд дарамтлуулсан хараат үндэстний эмгэнэлт хувь заяа романы гол сэдэв юм. Хятадын коммунистууд ХХІ зууны эрин үед Дорнод Туркестаны нутагт аж төрдөг үндэсний цөөнх ард иргэдийг шүүхийн шийдвэргүйгээр баривчилж, шоронд тамлан тарчилгаж, эрх чөлөөг нь боомжилж буй харгис хэрцгий үйл ажиллагаа тус зохиолд уран сайхны аргаар тусгалаа олжээ.
«Улс төрийн засан хүмүүжүүлэх төв» хэмээн нэрийдэж, казах, уйгар, урианхай иргэдийг үй олноор нь хорьж, дарлан доромжилсон хятад зандалчдын бусмармаг үйлдлийн эсрэг тэмцсэн нийгмийн зүтгэлтнүүдийн дүрээр зохиогч аливаа үндэстэн түүхэн газар нутагтаа эзэн суух хувь тавилантай гэсэн чин санааг харуулахыг зорьжээ.

Зохиолын үйл явдал анхаарал татам үнэнхүү сонирхолтой. Хятадын тагнуулын албаныхны Төв болон Дундад Азийн хөрш зэргэлдээ оршдог орнуудын дотоод хэрэгт шууд ба дам аргаар хэрхэн оролцож, яаж нөлөөлдгийг хурц шүүмжлэн илчилжээ. Түүнчлэн төрийн албан тушаалтнуудыг худалдан авах замаар улс, үндэсний ашиг сонирхолд ноцтой хохирол учруулдгийг ч анхааруулсан зохиол юм.
Романы зохиогч Куандык Шамахайулы (Ш.Хуандаг) бол Монгол оронд төрж, өссөн. Уран бүтээлээ казах, монгол хэлээр туурвидаг зохиолч.

#920