Барааны тайлбар:

Үйлийн лай үйлдсэн эзнээ гарцаагүй эргэх хорвоогийн зайлшгүй хуулийг агуу Виктор Гюго “Парисын Дарь эхийн сүм” романдаа хурцаар сануулж өгчээ. Урьд хожид таны үзэж сонсоогүй ариун хайрын тухай өгүүлэх тухайн зохиолд ертөнцийн бус гоо сайхныг цогцлоосон цыган бүсгүй, бие махбодь ба сэтгэлийн зэрэмдэгүүд болон хүн дүрд хувирсан мангасуудын дүрээр хайр дурлал, урвалт шарвалтын онц сонирхолтой түүхийг уран яруу харуулжээ. Хүн бие махбодь ба сэтгэлээрээ оргилд мандаж, бас ёроолд унаж болох түүхийг нүд салгахын аргагүй яруу тод дүрсэлсэн байна.
Бие махбодийн болон сэтгэлийн эрэмдэг хоёр хоорондоо хэчнээн их ялгаатайг харуулах аж. Парисын Дарь эхийн сүмийн хонхчин, үзэшгүй муухай, эрэмдэг бөгтөрийн дотоод сэтгэл хэчнээн хүч тэнхээтэй, сайн сайхныг тодруулахын ялдамд гадаад төрх байдал нь хараа булаам сайхан залуу Феб болоод сүрдэм, сүслэм буянтан харагдах Клод лам нарын дотор харин өнөөх бөгтөрөөс илүү аймшигтай, ямархуу зэрэмдэгүүд нуугдаж байгааг мартахын аргагүй дэлгэн харуулж чаджээ.
Парисын Дарь эхийн сүм зохиол нь уншсан хүний сэтгэлд үүрд мөнхөд орших чадвартай, хүн төрөлхтний суут бүтээлүүдийн нэг юм. Агуу хайрын гунигт түүхийг унших үед амсах ханамжийг үр хойчдоо хүртэл дамжуулахаас аргагүйд хүрнэ.
Эргэн тойронд хүсэл шунал оволзож, хайр дурлал бадарч, нүгэл буян цалгилж, харгислал яргалал дэлгэрч, ядуурал гуйланчлал ноёлж, хүн бүр үйлийн үрээ амсах амьдралын захгүй тэнгисийн дунд гагцхүү Парисын Дарь эхийн сүм мөнхөд сүндэрлэж, зуун зууныг дамжаад, үйлийн лайны тухай амгалан, сүрлэгээр сануулсаар үлджээ.

#722