Барааны тайлбар:

Романтик эхлэлийн дараа юу болох вэ?


Хятадын залуу зохиолч Жиү Шү Чаны олон улсад #best #seller болсон, сэтгэл хөдөлгөм хайрын түүх Монгол хэлнээ #ГЭРЛЭЛТ нэртэйгээр орчуулагдлаа. Та залуу насны гал халуун хайрыг дахин мэдэрч догдолмоор байвал, салж чадахгүйгээр адал явдалд шунан уншмаар байвал уг номыг санал болгож байна.

Бүлэг-1.

-Май, энэ банкны картыг ав. Гэртээ авмаар байгаа бүх юмаа аваарай, нууц код нь 131214.

Хэдэн цаг өнгөрсөн ч түүний шинэ нөхрийн өглөө ажилдаа явахаас өмнө түүний гарт банкны карт атгуулахдаа хэлсэн эдгээр үгс Жиан Раны чихэнд сонсогдсоор байлаа. Үнэндээ тэр нөхрийнхөө талаар бараг л юу ч мэдэхгүй. Түүний мэдэх зүйл нь ердөө л нөхрийнх овог Чин гэдгээс цаашгүй. Жиан Ран ердөө хоёр удаа уулзсан залуутайгаа гэрлэх зориг хаанаас нь гарсныг ч мэдэхгүй байв.

10 өдрийн өмнө Жиан Ран сайн найз Линг Фэйюгийн хүсэлтээр сохор болзоонд явж, энэ Чин Юү хэмээх залуутай танилцжээ. Үнэндээ уулзахаас өмнө түүнд ямар ч найдлага байсангүй. 3 жилийн өмнө түүнд тохиолдсон явдлаас хойш Жиан Раны шаардлага өндөр байхаа больжээ. Тэр зүгээр л энгийн байхыг хүсэж байлаа. Хэрэв хүн өөрийн шаардлагыг гүйцэлдүүлэхийг хичээхээ больчихвол зөвхөн эсрэг талдаа сайхан сэтгэгдэл үлдээн, өөр зүйлд анхаарлаа хандуулахад хангалттай болдог билээ. Тэр өөрт таалагдсан залуугаа олж гэрлэн, эцэг эхээ мартахыг хүсэж байлаа.

Түүний болзоот залуу яг цагтаа ирэв. Ажил хэрэгч хувцаслалт нь түүнийг энэ болзоонд багагүй ач холбогдол өгснийг нь илтгэнэ. Жиан Раны анхны сэтгэгдэл муугүй байв.

-Сайн байна уу, хадагтай Жиан. Намайг Чин Юү гэдэг хэмээн товчхон энгийн мэндчилэв. Хэдий товчхон зүйл хэлсэн ч түүний хоолой ер бусын, хүнийг татах чадвартай ажээ. Богинохон харилцан ярилцсаны дараа тэд утасны дугаараа солилцон болзоо өндөрлөв. Жиан Раны хувьд энэ болзоо бусад сохор болзооны л адил өнгөрч, бусдын адил үргэлжлэхгүй дуусах байх гэж бодож байтал хоёр хоногийн дараа түүнээс дуудлага ирлээ. Нөгөө л найрсаг дотно хоолойгоороо "-Хатагтай Жиан, та өнөө орой завтай юу?"

Тэр орой Чин Юү түүнийг Сичуан үндэсний зоогийн газар урилаа. Жиан Ранд энэ уулзалт тун ч тухгүй байсан тул эвтэйхэн түрүүлж явах арга хайж суулаа. Чин Юү хэсэг дүгдэрснээ "-Би ирэх лхагва гарагт завтай. Тэр үеэр явж гэрлэлтийн гэрчилгээгээ авбал ямар вэ?" гэх нь тэр. Жиан Ран гайхсанаа нууж чадсангүй "-Юуны гэрчилгээ гэнээ?"

-Гэрлэлтийн гэрчилгээ хэмээн Чин Юү давтан хэлсэн хоолойн өнгөнд ямар ч тоглосон шинж байсангүй.

-Гэрлэлтийн гэрчилгээ гэнээ ? хэмээн бас л сонссондоо итгэж чадсангүй асуулаа. Гараа явуулан гуяа чимхэж үзэхэд өвдөж байгааг бодоход тэр зүүдлээгүй бололтой. Анх удаа өмнөө суугаа залууг илүү нухацтай харав. Өргөн хөмсөг, гялалзсан нууцлаг нүд, өөгүй цэвэрхэн царай... Тэр маргаангүй царайлаг юм. Энэ залуу дөнгөж хоёрхон удаа уулзаж байгаа бүсгүйдээ гэрлэх санал тавилаа гэж үү. Жиан Раны бодлыг таслан тэр намуухан, дур булаам хоолойгоор:

-Би бодохдоо энэ болзоо угаасаа гэр бүл болон хүүхдүүдтэй болж энгийн амьдралаар амьдрах зорилготой уулзалт гэж бодсон. Та надтай адилхан зорилготой ирээгүй гэж үү?

-Тэр ч тийм л дээ. Гэхдээ энэ чинь бидний дөнгөж хоёр дахь уулзалт. Энэ хэтэрхий хурдан гэж та бодохгүй байна уу?

-Энэ жаахан хурдан л даа. Гэхдээ би эхний уулзалтын дараа хоёр хоногийн турш бодсон. Таны надад үлдээсэн анхны сэтгэгдэл муугүй байсан. Бидний хувь хүний шинж чанар хоорондоо зөрчилдөхгүй юм шиг санагдсан учраас би оролдоод үзэхээр шийдсэн юм.

Жиан Ран бага зэрэг бухимдаж:

-Гэрлэлт гэдэг тоглоом биш. Оролдоод үзээд болохгүй бол... гэтэл түүнийг үгийг таслан

-Жиан Ран, бид хүүхдүүд биш, насанд хүрсэн хүмүүс. Бид жинхэнэ хайр гэж байдаггүйг хоёулаа мэдэж байгаа. Бид зөвхөн юу хүсдэгээ мэдэж байхад хангалттай биш гэж үү?

Жиан Ран түүн рүү эгцлэн ширтэв. Тэр даруухан, төлөв төвшин царайтай хүн ажээ. Яг л түүний гэрлэх хүнээ төсөөлдөгтэй адил. Гэхдээ тийм байлаа гээд үлдсэн амьдарлаа энэ хүний гарт даатгаж болно гэж үү? Энэ боломжтой гэж үү?

Түүний эргэлзэж байгааг харсан Чин Юү:

-Уучлаарай, би таны хүслийг бодолгүй хэтэрхий түрэмгий ааш гаргачихлаа. Та бодож үзээд шийдээ хэлээрэй.

Жиан Ран гэртээ хариад шөнөжингөө энэ талаар бодов. Хамгийн чухал зүйл нь тэр хоёр хайрын талаар адилхан бодолтой ажээ. Түүний шархалсан зүрх хайр байдаг гэдэгт итгэхээ болиод удаж байгаа юм.

Маргааш өглөө нь Жиан Ран түүн рүү залган саналыг нь зөвшөөрч байгаагаа хэлэв. Тэр өдрийнхөө үдээс хойш тэр хоёр гэрлэлтээ батлууллаа. Иргэний бүртгэлийн газраас гэрлэлтийн гэрчилгээгээ бариад гарч ирэхэд түүний зүрхэнд үгээр илэрхийлж боломгүй сонин мэдрэмж төрөв. Гэрлэлт гэдэг төсөөлж байсан шиг нь энгийн зүйл биш ажээ. Энэ бяцхан гэрчилгээ түүний амьдралд энэ залууг эргэлт буцалтгүйгээр оруулж орхив.

Өчигдөр Жиан Ран Чин Юүгийн гэрт нүүж иржээ. Чин Юү шууд өөрийн санаачлагаараа тусдаа өрөөнд унтав. Жиан Ран түүнийг банкны карт өгнө гэж огтхон ч төсөөлсөнгүй. Чин Юүгийн бүх эзэмшлийг тэр хуваалцах эрхтэй гэж үү?

"Жиан Ран, бүх томоохон хэвлэл мэдээллийн хэрэгслийн сурвалжлагч нар, захирлуудын зөвлөл, бас шинээр томилогдож гүйцэтгэх захирал ирэх болчхоод байхад юугаа гөлрөөд зогсоод байгаа юм бэ" гэсэн олон нийттэй харилцах хэлтсийн менежер Шү Юйгийн хоолой түүний бодлыг таслав.

-Уучлаарай Шү менежерээ, би анхааралтай байна аа

-Чи энд зөвхөн туслахаар ирсэн, битгий асуудал үүсгээрэй хэмээн нухацтай хэлэв.

-Уучлаарай, дахиж ийм байдал гаргахгүй гэхэд Шү менежер түүнрүү хэсэг хараад цаашлан одов. Шү менежер алга ташин бүгдийн анхаарлыг татаад "Өнөөдөр чухал өдөр. Хэн ч жижигхэн ч болов алдаа гаргаж болохгүй шүү!" гээд бүх ажилчдыг тойруулан харав.

"Ойлголоо" хэмээн PR хэлтсийн ажилчид болон бусад албадаас тэдэнд туслахаар ирсэн ажилчид нэгэн дуугаар хариуллаа. Шү Юй менежер Жиан Ранруу эргэн "-Чамайг хэлтсийнхээ хамгийн шилдэг нь гэж сонссон. Тиймээс чи шинэ захирлын ажилд туслаарай, бусад хэрэгт анхаарах хэрэггүй" гэв. Жиан Раныг толгой дохин, үг хэлэх гэтэл Ма Дунно урьтан "-Хөөх Жиан Ран, шинэ захирал гэрлээгүй бол чи ч тэнгэрийн умдаг атгалаа гэсэн үг биз" хэмээн атаархлаа нууж ядан хэлэв.

Хэдий захиралтай ойр ажиллах нь сайхан боломж гэж бодоцгоож байвч, нөгөө талаар эрсдэлтэй учир Жиан Раны оронд орохыг хүсэх хүн байсангүй. Шү Юй Ма Дунно руу харан "энэ явдал бид бүхний ирээдүй хойчтой шууд хамааралтай юм гэдгийг сайн ойлго" хэмээв. Жиан Ран өөрийгөө тайвшруулан гүнзгий амьсгаа авав. Энэ гэнэтийн явдалд хэн ч Шү менежерийг буруутгасангүй. Бүгд компанидаа амар амгалан ажиллаж байтал захирлуудын зөвлөл шинэ CEO томилох гэж байгаа талаар цуурхал тарж, тэд сандарсан билээ. Хэдий цуурхал газар авсан ч шинэ захирлын талаарх мэдээлэл маш нууцлаг байлаа. Бүх алба хэлтсийн дарга нар төрөл бүрийн сувгаар мэдээлэл олох гэж оролдсон ч чадсангүй. Жиан Ран хэдийгээр элдэв хов жив сониучирхаад байдаггүй ч энэ удаа шинэ захирал ямархуу хүн бол хэмээн сонирхож, орох хаалгаруу хүзүү өргөн ширтэж байлаа.

"Тэд ирлээ, ирлээ" хэмээх угтан авагчийн дуу бүх ажилчдын сонорт хүрэв. Бүгд байр байрандаа биеэ цэхлэн хүлээцгээв. Жиан Ран Шү менежерийг даган, шинэ нууцлаг захирлаа угтахад бэлдэв. Хэдэн хормын дараа тэр мөнгөлөг саарал хослол өмссөн эрийг олж харлаа. Түүнийг хэд хэдэн хар хослолтой эр дагалджээ. Түүнийг харангуутаа Жиан Раны нүд нь орой дээрээ гарахаа шахав. Тэр мөнгөлөг хослолтой эр яахын аргагүй түүний шинэ нөхөр Чин Юү байлаа. Хий юм харж байна гэж бодоод нүдээ анивчин толгойгоо сэгсрээд дахин харлаа. Тэгсэн ч түүний харж байгаа царай өөрчлөгдсөнгүй. Тэр түүний шинэ нөхөр мөн байлаа. Өөгүй цэвэрхэн царай, булчинлаг өндөр биетэй дэгжин залуу. Магадгүй энэ зүгээр л түүний нөхөртэй адилхан царайтай хүн байх.

-Ч..Чин Юү?

Жиан Ран өөрийн мэдэлгүй түүний нэрийг амандаа чангаар хэлж орхив. Түүний хоолойг сонсоод мань залуу түүн рүү ширтэн харахад Жиан Ран сандарсандаа амьсгалахаа мартах шахлаа. Тэр түүний "энгийн" нөхөр нь өөрийнх нь ажилладаг компанийн захирал болно чинээ зүүдэлсэн ч үгүй. Залуу эр түүн рүү яг л огт танихгүй хүн харж байгаа мэт хэсэг харснаа өөр тийш анхаарлаа хандуулав.

Зохиолч: Жиү Ши Чан

Хуудас: 400

#1405